E aña aki Minister di Enseñansa, dr. Armando Lampe a anuncia cu Aruba lo conoce un cambio den enseñansa; ta trata di implementacion di Scol Arubano Multilingual (SAM) den tur scol preparatorio y basico na Aruba.
cambionan na caminda ta en conexion cu e metanan nucleo nacional cu Minister a acorda cuminsamento di e aña aki. E metanan nucleo ta contextualisa, pues ta carga un enseñansa adapta na nos situacion real, unda cu tur e cuater idiomanan -Papiamento, Hulandes, Ingles y Spaño- ta haya nan luga den e curiculo di e scolnan primario, cuminsando ya for di scol preparatorio.
Den cuadro di e implementacion di e metanan nucleo, Centro pa Desaroyo Profesional y Continuo (CDPC) di Instituto Pedagogico Arubano (IPA) a organisa merdia di informacion riba e trayectonan di profesionalisacion p’asina cuminsa cu e preparacionnan cu ta encera e parti di orientacion encuanto SAM.
Prome cu implementa SAM, scolnan mester ta, pa cuminsa, bon informa kico ta e cambionan cu ta bay tuma luga y tambe dicon e cambio mester tuma luga. E vision di SAM ta sumamente importante, pa motibo cu esaki mester ta carga door di tur e actornan den enseñansa.
P’esey e merdia di informacion tabata un momento hopi crucial y historico, ya cu esaki ta IPA su prome salida pa cuminsa comparti algun informacion y accentuando alabes e forma cu lo mester bay sigui traha cu otro pa hunto logra cu SAM ta bira un implementacion exitoso.
Pa e merdia di informacion a invita cabesantenan y maestronan cu tin un interes grandi y intrinsico pa cambio educacional y cu lo ta envolvi den e proceso di innovacion. E maestronan aki lo por tuma e rol di 'trekker' riba nan mes p’asina crea apoyo den e team. Nan rol lo ta pa sigui informa y motiva e team pa sigui busca informacion pa tur locual ta trata SAM.
E cambio pa SAM ta pidi su preparacion y un bista riba e materialnan cu a desaroya specificamente pa e scolnan multilingual. Pronto e scolnan lo haya mas informacion y guia di cerca. Pa cuminsa orienta for di awo caba y pa por sigui e ultimo desaroyonan riba e tereno aki, por bishita e website di DEA www.ea.aw y e pagina di facebook SAM – Scol Arubano Multilingual.