Dia 23 y 24 di augustus 2018 Instituto Pedagogico Arubano (IPA) a tene e asina yama IPA-kamp cu ya a bira un tradicion den e Siman di Introduccion na IPA. IPA-kamp ta dos dia di actividad social y recreativo pa studiante y personal di IPA cu tin como meta pa stimula e aspecto social den e instituto creando asina e sentido di colegialidad y union den e comunidad di IPA. IPA su propio studiantenan cu ta den e di dos aña di nan Estudio pa Maestro di Enseñansa Primario tabata encarga cu e organisacion di IPA-kamp.
E studiantenan a prepara un programa creativo cu un caracter educativo y social pa e comunidad di IPA. Riba e prome dia di IPA-kamp e gruponan a recore e area di San Nicolas en busca di clave caminda cu mester a contesta pregunta, forma palabra y hasta haci pantomina. E di dos dia di IPA-kamp a encera Wega Creativo y Wega sin Limite cu a tuma luga na Rodgers Beach. E gruponan a participa cu hopi entusiasmo na e actividadnan aki. Entre e gruponan y cada participante tabatin bon comunicacion p’asina reenforsa e ‘teambuilding’ di e gruponan. Tabata bisto cu nan a haci nan maximo esfuerso pa nan destaca como e grupo victorioso. E grupo Blue Survivors ta e grupo cu a score mas halto y asina a bay cu premio maximo di IPA-kamp 2018.
Un pabien na e studiantenan cu a organisa IPA-KAMP pa nan tremendo trabao. Sin lubida e team di docente cu a guia y sostene e studiantenan cu a organisa e IPA-kamp 2018. Un danki special ta bay na tur e sponsornan cu a contribui di un of otro manera na IPA-kamp 2018. Ta trata aki di Mercal Trading, Office Systems Aruba, Setar NV, Keke Mega Mart, Bopel, Roza's snacks, Purely Green, Aruba Airport Authority , Subway, ARTN Photography, IBISA, St Franciscus College, Andina Ice, Joenne Nicastia, Drops and Nuts, Compra y Casa Haime. Masha danki pa haci IPA-kamp 2018 un exito rotundo.