.JPG)
Ambiente, creatividad y bon vibra tabata loke a reina durante IPA su prome actividad social pa aña academico 2021-2022. Manera nos tur sa, den e ultimo dos añanan e pandemia di COVID-19 a trece cambio den nos estilo di biba. Pa un temporada largo nos mester a mantene distancia social di otro. Awo cu cosnan a cuminsa normalisa, e departamento Bureau Voorlichting en Sociale Activiteiten (BUVOS) di IPA ta haya importante pa organisa un actividad social ‘face to face’. Pa e motibo aki a ranca sali cu un tremendo car rally como inicio pa e actividadnan cu lo sigui tuma luga. Di e forma aki nos ta fortalece e union den e instituto y alabes crea espacio pa ciudo y amor propio di cada miembro di IPA den un ambiente placentero.
E studiantenan y personal di IPA, den grupo di maximo cinco, tabatin un reto grandi y excitante, unda nan mester a recori e area di hotel, Bushiri y vecindario en busca di pista caminda cu mester a contesta pregunta, colecta obheto y hasta traha nan propio ‘cheer’.
E gruponan a participa cu hopi entusiasmo na e car rally. Tabata bisto cu tur grupo a haci nan maximo esfuerso pa destaca como e grupo victorioso. A rekeri bon comunicacion, creatividad y colaboracion p’asina termina e ruta di e car rally exitosamente. Tur esaki sigur a reenforsa e teambuilding cu sigur tabata un di e metanan principal di BUVOS pa cu e actividad aki. Na final di e car rally ambos studiante y personal a ‘takeover’ e escenario di Jungle Vibes p’asina ‘playback’ artista local y internacional y pone hopi ambiente. Asina nos a descubri, talento scondi! Bishita e pagina di facebook Jungle Vibes y Instituto Pedagogico Arubano y wak pa bo mes.
Resultado di e car rally ta como lo siguiente: Di tres luga: grupo Earl & Angels Segundo luga: grupo Los Indecisos Ganado absoluto: grupo Buscando pa loco Miho uniforma: grupo Fast & Serious Prome registracion: grupo Lengalicious Miho cheer: grupo Las Hongas Grupo disciplina: grupo Powerpuff
Un danki special ta bay na tur e sponsornan cu a contribui na IPA su actividad social. Ta trata di Kulture Café, Subway, Romar Trading, Chillerz, Twelvi, Aruba Aloe, Oduber Agencies Aruba, Local Store, Paradise Candles, Paper Sisters, Adorée Lifestyle Concrete, Ma Didi, Chocoglam, Faro Blanco Restaurant Aruba, Setar NV, HLNY, Buoyah Aruba, Bake a wish, Lamunchi, Sende Candles y Chantis. Tambe un palabra di gratitud ta bay na Jerino Bass pa entre otro facilita IPA cu Jungle Vibes. Alabes nos kier gradici e boluntarionan cu a contribui na e car rally, e team di BUVOS cu tabata encarga cu e parti organisatorio y Lubert Feliciano cu tabata encarga cu e contenido di e car rally. E comunidad di IPA no tin palabra pa gradici boso pa boso aporte. Masha danki pa haci IPA su car rally un exito rotundo!