Recientemente, Instituto PedagogicoArubano (IPA), a tene su ceremonia di graduacion di aña academico 2021-2022. Cu orguyo, IPA ta anuncia cu awor nos enseñansa ta conta cu un grupo di 51 maestro cu lo reenforsa nos educacion na Aruba. E graduadonan tin diferente specialisacion, entre otro, Pedagogisch Didactisch Getuigschrift, Bachelor Papiamento Trayecto Cortico, Master Educational Needs, Nederlands als 2e Graads, Estudio pa maestro di Enseñansa Primario, Movecion y Salud y Bachelor Papiamento.
E studiantenan cu a gradua den aña academico 2021-2022 ta Pedagogisch Didactisch Getuigschrift: Vivian Carter, Geraldine Croes, Cristina Guzmán, Efren Isei, Hellen Koolman, Anselmo Mathew, Sasha Ridpath. Bachelor Papiamento Trayecto Cortico: Ghislady Angela, Joanne Charles, Angelique Lampe, Ludmilla Martinez, Catherine Ramirez, Xialainne Ras, Richenella Richardson. Master Educational Needs: Yzaira van der Linde. Nederlands als 2e Graads: Shemille Giel. Maestro di Enseñansa Primario: Maryan Benitez, Giandra Dijkhoff, Maryleine Gomez, Mireilla Kock, Finelaine Tromp, Richinella Croes, Rachela Dirksz, Jary-ann Geerman, Shaylee Loopstok, Isabel Santana Cruz. Movecion y Salud: Christen Goeloe, Annelaine Jacobs, Anna-Celia Proveyer Llópiz, Juliandrah Rodriguez. Bachelor Papiamento: Roxienne Brete, John Caton, Natalia El-Hindi, Brandon Figaroa, Lee-Ann Figaroa, Keilah Geerman, Gislaine Jacobs, Münhayla Jansen, Luz-Marina Kock, Lishaira Lubo Badillo, Nathaly Maduro, Nilka Montalvo, Geraldine Nadall, Josephine Peterson, Shirley Rafini, Elliënne Riatiga, Natalia Rodriguez, Michel Solis Montoya, Cheritza Tromp, Giliane Wester, Sergio Winterdal.
Durante e graduacion, directora general drs. Marilyn Richardson a dirigi palabra na e publico presente, specialmente na e graduadonan. Den su discurso, drs. Richardson a splica cu den bida tin diferente momento cu nos por categorisa como un momento inolvidabel y pa un studiante of cursista e momento cu e por ricibi su diploma ta un momento culminante pa clausura un capitulo importante y alabes cuminsa cu e siguiente.
Futuro sin limite tabata e tema di IPA su graduacion. Segun drs. Richardson, cada graduado ta creador di nan propio futuro. E mensahe cu el a comparti cu e graduadonan ta pa no pone limite na desaroyo propio y sigui siña pa ta un miho persona, un miho profesional, un lifelong learner p’asina hunto nos crea un miho mundo pa nos tur. No pone limite na locual bo por saca di bo alumno, no pone limite na cuanto bo ta kere den bo alumno y stimula nan pa kere den nan mes. No pone limite riba cuanto bo por inspira y influencia. Tin un mente habri sin limite pa por descubri e don y talento di cada mucha, hoben y di bo mes y sa con pa uza e talentonan aki pa aporta na un educacion y enseñansa di calidad.
PEN2030 ta para pa, entre otro, responsabilidad comun pa un enseñansa di calidad, ‘empowerment’, respet, mentalidad habri y curiosidad pa siña. Drs. Richardson a splica cu e graduadonan tin e base aki den nan formacion como maestro, pero awo ta keda na cada un di nan pa keda nutri e balornan aki p’asina carga e vision di PEN2030.
Drs. Richardson a termina su discurso bisando e graduadonan cu nan ta drentando un fase nobo den nan bida y cu e kier recorda nan cu cada fase den bida ta rekeri un version diferente di nan. Esaki simplemente kiermen cu nan tin cu sigui desaroya nan mes constantemente p’asina por cumpli cu e demandanan nobo den nos enseñansa.
Sergio Winterdal, graduado di e estudio Bachelor Papiamento, a duna un discurso inspirativo na e publico presente. E mensahe principal cu Sergio a comparti ta: “Durante e añanan na IPA, specialmente durante e pandemia nos a encontra nos mes cu un incertidumbre di kico ta spera nos cu nos estudio. Nos a haya nos mes ta adapta y crece di e situacion. Tuma e momento ey como un momento di aprendizahe, paso bida lo keda tira nos curve-balls, y ni maske con duro e bala ey bin sa cu bo ta imperfectamento perfecto pa tuma cualkier reto. Y si pa un momento den bida bo mester faya tuma esaki como e momento ideal pa defini bo mes. Paso ta te ora bo conoce fayo bo lo balora e sentimento di logro mas. E dushi sensacion di euforia cu boso ta sintiendo, cord’e, grab’e den boso mente, paso mescos cu nos añanan na IPA e tambe lo yega su fin. Memorisa e palabranan aki, tempo ta suerte, kiermen no bay biba otro hende su bida, bringa pa locual ta importante pa bo. Paso ta facil pa tin speransa riba un dia bunita manera awe, pero corda cu lo tin dia scur cu nos lo a mester enfrenta y dia e dia ey yega, haci mi un promesa. Nunca perde speransa, ni maske con dificil e situacion ta! Y si bo encontra un persona cu ta den su dia scur ta e lus di speransa p’e! Ta cu pasion, curashi y un sin fin di conocemento nobo nos ta dal nos prome paso pa futuro. No ta prome impresion semper ta corecto, bo mester tin fe den hende, pero mas importante tin fe den bo mes! ”.
E anochi aki tabata uno hopi ameno, caminda e comunidad di IPA conhuntamente cu famia y invitado di e graduadonan a celebra nan logro den e Grand Ballroom di Aruba Marriott Resort & Stellaris Casino. E anochi tabata acompaña cu e tononan musical di Jerrino Bass and Friends.
IPA ta desea tur colega nobo un carera fructifero y exitoso. Nos ta spera cu Todopoderoso lo guia y duna boso sabiduria pa eherce e bunita profesion di maestro cu hopi amor y dedicacion. Pabien na tur graduado y un feliz vakantie na tur e maestronan y muchanan di Aruba!