Entrevista cu studiante di IPA, Zayenne Gomez
“Hopi biaha mi sa sinta refleha y encurasha mi mes bisando,miho mi sacrifica 4 aña enbes di sacrifica e resto di mi bida, eherciendo un profesion cu mi no tin pasion p’e”
Esaki ta expresion di Zayenne Gomez,mama di tres yiu, cu actualmente ta den su ultimo fase di e Estudio pa Maestro di Enseñansa Primario, specialidad 4 pa 8 aña, cu Instituto Pedagogico Arubano (IPA) ta ofrece. E fase aki ta enfoca riba e futuro situacion di trabao. Durante e fase aki e studiante mester implementa tur conocemento, actitud y habilidad cu el a adkiri durante e añanan anterior: haci uzo di diferente forma di traha saliendo for di experiencia y mundo sensorial di e mucha, diferenciacion y teneniendo cuenta cu diferente base social y cultural. Alabes, banda di duna les, e studiante tin cu realisa dos actividad, cu ta meso, cu ta na nivel di scol, y micro, cu ta na nivel di klas.
Cu hopi esfuerso y perserverancia Zayenne ta den proceso di cumpli cu su deseo di bira maestro di scol. Awe e kier comparti su storia p’asina inspira y encurasha e studiantenan actual di IPA y tur otro persona cu ta desea di bira maestro.
Zayenne ta bisa “Mi por scoge pa ta kico cu mi kier den bida, mi a scoge pa ta maestro. Pakico? Paso den mi opinion despues di e mayornan, e maestro ta e siguiente persona cu ta contribui na formacion di e mucha. Como parti di nos structura di educacion, tur persona den nos comunidad mester a sinta den banki pa tuma les for di un maestro di scol.”
Na aña 2015 Zayenne a inicia cu su estudio na IPA. Su trayectoria na IPA no tabata uno facil, mirando cu e ta un mama soltera cu tres yiu. Pa Zayenne tabata importante pa por tin balansa entre su estudio y su bida personal. Ambos, su estudio y yiunan, ta exigi hopi tempo y energia for di dje. Varios obstaculo a presenta, cual tabata pone cu Zayenne kier a give up.Sinembargo, etabata haya forsa den su yiunan y e tabata corda riba e promesa cu el a haci su mayornan, p’asina continua cu su estudio. “Mi tabata comunica hopi cu mi mayornan y mi mentornan.Hunto nos tabata busca un solucion pa cada obstaculo.Hopi biaha mi sa sinta refleha y encurasha mi mes bisando, miho mi sacrifica 4 aña enbes di sacrifica e resto di mi bida, eherciendo un profesion cu mi no tin pasion p’e”.
Actualmente Zayenne ta haciendo su ultimo practica na Colegio Santa Filomena den klas dos. Zayenne seguramente no ta e mesun studiante timido cu a drenta IPA na 2015. Zayenne ta conta: “Mi a cuminsa e estudio aki cu hopi miedo di faya. Esaki por a ripara ora di presenta of duna les durante practica. Mi no tabatin confiansa den mi mes, mi tabatin miedo di haci fout. Na e momento cu e docentenan di materia (vakdocentnan) of guia principal (algemenebegeleider) ta presente mi curason tabata bati masha duro mes. Loke a pone mi haya confiansa den mi mes ta cu na final, cu mi caba di duna les, e comentarionan positivo y constructivo cu mi tabata haya for di guia principalydocente di materia. Awo cu mi ta den mi fase final di estudio mi por bisa cu mi ta sinti cu I run the world ora cu ta trata di duna les.
Zayenne a crece ambos riba tereno profesional y personal. “Mi no por imagina con hopi mi a crece como persona engeneral. Con pa reacciona y comporta mi mes ora mi bisti e pechi di maestro, ta un sensacion unico, mi no ta pensa solamente pa mi mes, pero tambe cu mi ta un persona ehemplar pa nos muchanan,hasta ora mi ta pafo di scol. E estudio aki a siña mi think outside the box mayoria biaha ora mi ta traha mi lesnan, cual ta yuda pa crea un esfera sublime den klas. Mi comunicacion cu colega, docentenan y alumnonan a bira mihodurante e añanan. Mi a crece den e parti didactico, con pa duna les, den e parti pedagogico, con pa trata cu alumno y finalmente e parti organisatorio, con pa organisa mi klas pa por tin structura y tene mi mes na e tempo stipula pa duna les.”
Zayenne ta termina su storia cu e siguiente palabranan: “Pa tur persona cu kier cuminsa e estudio pa maestro di enseñansa primario no tene miedo. Sigui bo deseo y no warda pa mañan. Pa tur esnan cu ta den IPA caba mi conseho ta no give up, cada dia cu pasa ta un dia mas cerca di bo diploma.”