Ser maestro ta un profesion di curason. Ta un profesion cu ta encera guia mucha y hoben den bira futuro profesional den nos comunidad. Como maestro bo ta forma parti di tanto desaroyo intelectual como desaroyo emocional di tur alumno. E impacto cu bo ta haci como maestro riba cada alumno ta excepcional.
Diabierna atardi, dia 12 di november, IPA lo tene e tradicional Dia Publico. Comunidad di Aruba ta invita pa atende e Dia Publico aki cu ta hiba e nomber ‘Next Stop … IPA’ y tin como lema ‘E destinacion pa crea tur otro profesion’.
Riba e pagina di Facebook Instituto Pedagogico Arubano lo comparti durante e dianan prome cu e Dia Publico, experiencia y pensamento di diferente docente y studiante p’asina tin un idea di kico e profesion di maestro ta encera.
Aña academico 2022-2023 IPA ta ofrece e estudio pa maestro di Enseñansa Primario (docente di kleuter y scol basico) y Bachelor Nederlands als Vreemde Taal (docente di Hulandes di dos grado di scol secundario). Banda di esaki lo duna informacion di e cursonan di recapacitacion cu Centro pa Desaroyo Profesional Continuo lo ofrece durante e aña academico aki.
Tur presente lo tin oportunidad di haci pregunta y combersa cu e studiantenan di IPA. Di e manera aki bo por scucha for di e studiantenan con nan ta experiencia e estudio na IPA y sigur haya bon tip con pa studia exitosamente.
IPA ta invita comunidad di Aruba, specialmente tur studiante di havo, vwo, mbo/epi nivel 4 of 21+ Toets, maestro y tur otro persona interesa pa cuminsa un estudio na IPA pa ‘like’ e pagina di Facebook Instituto Pedagogico Arubano, p’asina bo keda na altura di tur informacion di ‘Next Stop … IPA’.
Pa mas informacion por bishita nos website www.ipaaruba.com of pagina di Facebook y si ainda bo tin cualkier pregunta, por tuma contacto cu Studenten Services na 5243100.