E curso di Certificacion Pedagogico Didactico (PDG) ta un curso parcial pa e profesionalnan cu kier ta competente den e profesion di docente of educador. Pa medio di e curso di PDG e profesionalnan por desaroya competencia pedagogico y didactico. Graduado di PDG por duna un materia na enseñansa profesional y scol avansa. E curso tin un duracion di entre 18 luna y 2 aña. E cursista lo haya les dos biaha pa siman na Instituto Pedagogico Arubano (IPA). Banda di esaki lo tin tarea pa haci na cas, na scol, online y tarea practico. E curso di PDG lo cuminsa na september 2023.
Tin dos grupo di participante cu por haci e curso di PDG: 1. maestro cu ta traha no-certifica, esta ‘onbevoegd’ den enseñansa avansa e.o. EPI y MAVO. 2. profesional di otro sector e.o. empresa of instancia cu no ta enseñansa, cu tin interes y motivacion pa sa mas di e profesion di educacion, y cu kier traha riba nan conocemento y habilidad pedagogico didactico. Pa e grupo di profesional aki PDG ta un rekisito pa drenta sector di enseñansa. (minimale diploma toelating ta HBO).
Bo ta cumpli cu e rekisitonan menciona y ta desea di ricibi e Certificacion Pedagogico Didactico cu IPA ta ofrece? Bishita www.ipaaruba.com, bay na aanmelden y scoge pa PDG y sigui e instruccion. Ora ta bay pa yena e formulario digital, mester tin PDF di diploma(nan) y lista(nan) di cifra ‘gewaarmerkt’ pa agrega esakinan na e formulario. E ultimo dia pa inscribi ta 31 di mei 2023. Despues di e fecha aki no por inscribi mas pa aña academico 2023-2024.
Pa mas informacion por bishita nos website www.ipaaruba.com of pagina di Facebook ‘Instituto Pedagogico Arubano’ y si ainda tin cualkier pregunta, por tuma contacto cu Studenten Services na 5243100.