Inscripcion pa curso di PDG-11 a habri!

Asina mes! PDG ta habri su inscripcion pa por sigui PDG-11. E curso di Certificacion Pedagogico Didactico (PDG-11) ta un curso parcial pa e profesionalnan cu kier ta competente den e profesion di docente of educador.

Abo of un conocir di bo ta cla pa un cambio di carera? Semper bo tabatin aspiracion pa aporta na enseñansa? Bo tin afinidad y interes pa traha y yuda den e desaroyo di mucha y hoben? E ora ta PDG-11 di IPA ta na unda bo mester ta!

PDG-11 ta e di 11 grupo cu ta bay haci e curso aki y awo mas cu nunca mester probecha paso e programa completo ta renoba! Un team relativamente hoben, ambicioso, creativo y cu hopi experencia den enseñansa a bini hunto pa renoba e programa di PDG.

Kico ta nobo bo ta puntra bo mes? Ata algun punto di salida aki cu ta innovativo y unico di e programa aki:

• Un duracion total di 24 luna, pero cu oportunidad personalisa pa caba mas trempan den 18 luna!

• ‘Deep learning’ cu hopi atencion y tempo pa practica y ta hands-on bezig.

• Un team dinamico cu mas prioridad pa guia e desaroyo profesional y personal di cada participante.

Ken por aplica na e curso aki?

• Maestro cu ta traha no-certifica, esta ‘onbevoegd’ den enseñansa avansa e.o. EPI y MAVO.

• Profesional di otro sector e.o. empresa of instancia cu no ta enseñansa, cu tin interes y motivacion pa sa mas di e profesion di educacion, y cu kier traha riba nan conocemento y habilidad pedagogico didactico. Pa e grupo di profesional aki PDG ta un rekisito pa drenta sector di enseñansa.

Tur informacion di PDG-11 ta riba website di IPA. Subi www.ipaaruba.com y click riba CDPC sigui pa ‘Opleidingen’ y despues PDG-11. Aki lo bo haya informacion di entre otro contenido di e estudio, kico bo por haci despues di e estudio, gasto y procedura di inscripcion. Durante IPA su open dag, dia 4 di november 2023, lo ofrece dos sesion di informacion general di e curso di PDG-11 cu bo lo por atende. E orario di sesion 1 ta 10:30 am y di sesion 2 ta 11:30 am.

Inscripcion

Bo ta cumpli cu e rekisitonan menciona y ta desea di ricibi e Certificacion Pedagogico Didactico cu IPA ta ofrece? Bishita www.ipaaruba.com, bay na aanmelden y scoge pa PDG y sigui e instruccion. Ora ta bay pa yena e formulario digital, mester tin PDF di diploma(nan) y lista(nan) di cifra ‘gewaarmerkt’ pa agrega esakinan na e formulario. E waarmerking ta sosode na Dienst Inspectie.

Bay riba nan website pa mas informacion: https://www.ea.aw/pages/certificacion-di-diploma/

E ultimo dia pa inscribi ta 27 di mei 2024. Despues di e fecha aki no por inscribi mas pa aña academico 2024-2025.

Pa mas informacion bishita nos website www.ipaaruba.com of pagina di Facebook ‘Instituto Pedagogico Arubano’ y si ainda tin cualkier pregunta, por tuma contacto cu Studenten Services na 5243100.