“Mi a haya e open dag bon paso mi por a participa na algun actividad cu ta forma parti di e estudio y asina experiencia e bida di studiante. Alabes mi a ricibi informacion amplio di e estudio” - anonimo
“E open dag tabata hopi bon prepara y atractivo” - anonimo
“E open dag tabata hopi leuk. Locual cu mi a gusta mas ta di por a mira con e docentenan ta incorpora tecnologia pa sostene nan les y asina hacie atractivo”- anonimo
Esaki ta expresion di algun persona cu a presencia open dag aña pasa. Motibo valido pakico abo cu tin e pasion pa bira maestro of cu ta explora opcion di estudio, join nos diasabra awo, dia 4 di november 2023, na Instituto Pedagogico Arubano (IPA) su open dag. Esaki ta di 10:00 am - 12:30 pm na IPA (Isaac Wagemakerstraat 11, San Nicolas).
Durante open dag nos lo duna informacion di e estudio pa Maestro di Enseñansa Primario, Bachelor Nederlands als Vreemde Taal, Curso di Certificacion Pedagogico Didactico (PDG) y asina yama 21+ Toets.
Tuma nota cu cada estudio tin su grupo meta y orario specifico pa por haya informacion:
Estudio pa Maestro di Enseñansa Primario
E estudio pa Maestro di Enseñansa Primario ta forma maestro cu ta cualifica pa duna les na mucha di scol preparatorio y/ of scol basico.
Durante open dag lo tin 2 sesion cu e bishitante lo por atende pa ricibi informacion di e estudio. E orario di sesion 1 ta 10:15 am y di sesion 2 ta 11:00 am.
Pa e estudio aki nos lo brinda the ‘whole experience’. E bishitantenan lo participa activamente na actividad cu nos docentenan di diferente area di formacion (Matematica, Arte, Idioma y Comunicacion y Pedagogia) a prepara pa nan. Lo clausura e experiencia aki cu un presentacion di informacion general.
Bachelor Nederlands als Vreemde Taal
Bachelor Nederlands als Vreemde Taal ta un estudio pa bira docente Bachelor di Hulandes cu ta cualifica pa duna les na alumno di EPB, EPI, mavo y e prome tres añanan di havo y vwo.
E orario di sesion 1 ta 10:30 am y di sesion 2 ta 11:30 am.
Pa inscribi pa e dos estudionan ya menciona mester tin diploma di havo, vwo of mbo nivel 4 (of den examenklas di un di esakinan).
21+ Toets
Tur persona cu tin desde 1 di september 2025 minimo 21 aña y cu kier haci un estudio na IPA pero no tin diploma di sea havo, vwo of mbo nivel 4, ta bin na remarca pa haci e asina yama 21+ Toets. E 21+ Toets ta midi si bo tin e nivel di havo cu ta necesario pa por studia na IPA. Si bo logra pasa e 21+ Toets cu exito bo por inscribi pa un estudio inicial cu IPA lo ofrece durante aña academico 2025-2026. Asina cu bo inscribi bo ta bin na remarca pa participa na e test di admision (beroepstest) y e programa preparatorio (voorprogramma) cu lo tuma luga durante aña academico 2024-2025. Si bo logra pasa e test di admision cu exito y completa e programa preparatorio bo por cuminsa cu bo estudio na augustus 2025. E orarionan cu bo lo por ricibi informacion general di 21+ Toets ta sea 10:30 am of 11:30 am.
PDG
PDG ta un curso parcial pa e profesionalnan cu kier continua nan carera den ramo di enseñansa. Pa medio di e curso di PDG e profesionalnan por desaroya competencia pedagogico y didactico. E orarionan cu bo lo por ricibi informacion general di e estudio aki ta sea 10:30 am of 11:30 am.
Benta di pasaboca
Nos studiantenan di aña 3 di estudio pa Maestro di Enseñansa Primario lo t’ey presente cu benta di pasaboca. Meta di esaki ta pa recauda fondo pa e pasantia internacional cu ta forma parti di e curiculo di nan estudio.
Actividad pa mucha
Lo tin actividad specialmente pa nos muchanan cu lo asisiti nos open dag. Di e forma aki tur adulto por asisti na e sesionnan di informacion sin mester preocupa pa e chikitin mirando cu e lo ta bon entretene.
Informacion
Pa keda altanto di tur e ultimo desaroyonan encuanto open dag y IPA en general bishita nos pagina di facebook Instituto Pedagogico Arubano of nos website www.ipaaruba.com. Riba nos website tin un pagina cu yama open dag cu ta contene tur informacion relaciona cu IPA su open dag. Alabes tin storia cortico di nos studiantenan. Lesa e storianan y keda inspira pa scoge pa e profesion di maestro!
IPA ta invita henter comunidad di Aruba, specialmente tur persona cu ta interesa pa haci un estudio na IPA pa asisti na nos open dag. Probecha di e oportunidad pa haya tur informacion personalmente y haci pregunta.
Bin combersa cu nos!