Durante aña academico, Instituto Pedagogico Arubano (IPA) ta brinda diferente oportunidad pa studiantenan finalisa y presenta nan investigacion final. Diamars, dia 7 di october 2025, e prome grupo di studiantenan lo duna nan presentacion. IPA ta invita famia, conocir y tur esnan cu ta labora den e sector di enseñansa pa asisti na presentacionnan di e proyectonan di investigacion final di e studiantenan di e estudio pa Maestro di Enseñansa Primario y Pedagogisch Didactisch Getuigschrift. Den cuadro di finalisacion di e estudionan menciona, e studiantenan cu ta den e ultimo fase mester haci un investigacion tocante un tema cu tin di haber cu innovacion y desaroyo den enseñansa. Banda di e investigacion e studiante mester a desaroya material educativo relaciona cu e tema cu el a profundisa su mes den dje. Di e investigacion y material aki e studiante lo duna un presentacion cu ta forma parti di examen final.
Un investigacion y e investigado ta haya su balor y tin un impacto den nos enseñansa ora esaki ser comparti cu un publico amplio. Pa e motibo aki, IPA ta habri su porta pa tur cu ta interesa pa wak y siña di e presentacionnan di e investigacion cu studiantenan a realisa den practica. Nos ta encurasha en particular maestro- y docentenan cu ta interesa den un of mas topico pa probecha di e oportunidad special aki pa keda altanto di idea- y sugerencianan cu abo tambe por incorpora den bo practica.
E presentacionnan lo tuma luga na IPA (Isaac Wagemakerstraat 11, San Nicolas) y ta di 14:00 pa 14:45 di atardi.
E temanan di investigacion y e studiantenan cu lo presenta ta:
Orario: 14:00 – 14:45Enseñansa Primario (PO - Primair onderwijs)
Rozanne Clement: Iedereen hoort erbij: Buitensluiten van leerlingen opsporen en verminderen in de klas, in de midden- en bovenbouw
Mirianne Gomez: Taal als sleutel tot leren: Didactische strategieën voor het versterken van woordenschat bij meertalige leerlingen
Pedagogisch Didactisch Getuigschrift (PDG)
- Rowald Wever: Van boek naar beeldscherm: Effectieve integratie van digitale leermiddelen in mbo-zorgonderwijs (niveau 3 & 4)
Orario: 15:00 Resultado di presentacion
IPA ta desea e studiantenan exito cu nan presentacion di investigacion.