Opendag

Talk IPA to me

“Talk IPA to me!” Esaki ta e tema di Instituto Pedagogico Arubano (IPA) su open dag 2023 cu lo tuma luga diasabra 4 di november di 10:00 am - 12:30 pm na IPA. Nos kier pa abo, cu tin e pasion pa bira maestro, bin combersa cu nos y si bo ta explora opcion di estudio, join nos y laga nos inspira bo. Riba e pagina aki nos lo comparti cu bo storianan inspirativo y educativo di nos studiantenan y graduadonan di IPA. Alabes nos lo publica informacion importante relaciona cu open dag cu bo no por perde. Bishita e pagina aki regularmente pa bo keda altanto.

Kico por spera na open dag?

Durante open dag nos lo duna informacion di e estudio pa Maestro di Enseñansa Primario (PO), Bachelor Nederlands als Vreemde Taal (BaNeVT), Curso di Certificacion Pedagogico Didactico (PDG) y asina yama 21+ Toets. Pa por inscribi pa PO y BaNeVt nos ta pidi e siguiente rekistionan: diploma di havo, vwo of mbo nivel 4 (of den examenklas di un di esakinan).Pa yega na remarca pa 21+ Toets bo mester tin minimo 21 aña desde 1 di september 2025. PDG ta specialmente pa e profesionalnan cu un minimo di bachelor diploma cu kier continua nan carera den ramo di enseñansa.

Nos studiantenan di aña 3 di estudio pa Maestro di Enseñansa Primario lo t’ey presente cu benta di pasaboca pa recauda fondo pa e pasantia internacional cu ta forma parti di e curiculo di nan estudio. Lo tin actividad specialmente pa nos muchanan. Di e forma aki tur adulto por asisti na e sesionnan di informacion sin mester preocupa pa e chikitin mirando cu e lo ta bon entretene.

Estudio pa Maestro di Enseñansa Primario

Bo kier aporta na formacion di nos muchanan? Bo ta un persona cu por carga responsabilidad y traha independientemente of den ekipo? Bo ta curioso y creativo? Si e contestanan ta si, e ora e estudio pa Maestro di Enseñansa Primario, cu IPA ta ofrece, ta e estudio ideal pa bo. Estudio pa Maestro di Enseñansa Primario ta forma maestro cu ta cualifica pa duna les na mucha di scol preparatorio y/ of scol basico: un maestro cu ta funciona competentemente den klas, na scol y den comunidad.

Conecta cu studiante

Si bo ta pensa of a dicidi di cuminsa un estudio of curso na IPA, ta nifica cu bo ta cla pa cuminsa un etapa nobo. Lesa e storianan inspirativo di nos studiantenan y keda motiva pakico bo tambe por scoge pa e profesion di maestro.

21+ Toets

Tur persona cu tin desde 1 di september 2025 minimo 21 aña y cu kier haci un estudio na IPA pero no tin diploma di sea havo, vwo of mbo nivel 4, ta bin na remarca pa haci e asina yama 21+ Toets. E 21+ Toets ta midi si bo tin e nivel di havo cu ta necesario pa por studia na IPA. Si bo logra pasa e 21+ Toets cu exito bo por inscribi pa un estudio inicial cu IPA lo ofrece durante aña academico 2025-2026. Asina cu bo inscribi bo ta bin na remarca pa participa na e test di admision (beroepstest) y e programa preparatorio (voorprogramma) cu lo tuma luga durante aña academico 2024-2025. Si bo logra pasa e test di admision cu exito y completa e programa preparatorio bo por cuminsa cu bo estudio na augustus 2025.

Pedagogisch Didactisch Getuigschrift (PDG)

E curso di Certificacion Pedagogico Didactico (PDG-11) ta un curso parcial sea pa e profesionalnan cu kier ta competente den e profesion di docente of educador of pa e docente cu ta traha ‘onbevoegd’ den enseñansa avansa.

Abo of un conocir di bo ta cla pa un cambio di carera? Semper bo tabatin aspiracion pa aporta na enseñansa? Bo tin afinidad y interes pa traha y yuda den e desaroyo di mucha y hoben? E ora ta PDG-11 di IPA ta na unda bo mester ta!

PDG-11 ta e di 11 grupo cu ta bay haci e curso aki y awo mas cu nunca mester probecha paso e programa completo ta renoba! Un team relativamente hoben, ambicioso, creativo y cu hopi experencia den enseñansa a bini hunto pa renoba e programa di PDG.

Ingredientenan

di un maestro extraordinario

Un maestro extraordinario ta den e estado di refleha su vocacion y transmiti esaki na su alumnonan. E sa con pa lanta interes cerca su alumnonan y haci nan curioso. E preparacionnan di les di e tipo di maestronan aki ta keda caracterisa pa e busceda di un formula magico, un receta di exito, cu ta contesta e necesidadnan esencial di nan alumnonan.

Pero cua ta e ingredientenan cu ta haci e maestro uno extraordinario? Aki nos ta comparti algun di nan cu boso:

Amor: un maestro ta uno cu ta duna enseñansa di curason. E ta stima mucha y ta mira nan bienestar na prome luga.

Inspiracion: e maestro ta carga e responsabilidad pa inspira su alumnonan pa haya interes y sea activo den nan actividadnan diario.

Atento: un maestro cu ta pone atencion, take care y duna sosten na su alumno.

Motivacion: e maestro ta motiva su alumno den su estudio, pero tambe den otro area di interes, por ehempel, deporte y arte, p’asina saca lo maximo di su potencial.

Empatia: un maestro mester tin e habilidad di por pone su mes den pensamento y sentimento di su alumnonan.

Perseverancia: e maestro ta encurasha su alumno y dun’e e empuhe cu e tin mester p’asina no rindi ora cu reto presenta.

Creativo: un maestro ta duna su alumnonan e espacio pa ta creativo. Creatividad ta multidisciplinario, e ta laga un mucha of maestro expresa su mes y ta promove habilidad di soluciona problema y hopi mas.

FAQ